“प्रत्येक मुलासाठी संधी, आदर, समानता” हा संदेश

आशा इंटरनॅशनल स्कूलच्या वार्षिक कार्यक्रमाचा समारोप

पिंपरी : आशा इंटरनॅशनल स्कूलच्या वार्षिक कार्यक्रमाचा समारोप उत्साह, आनंद आणि सर्वसमावेशकतेच्या संदेशासह झाला. या कार्यक्रमात समाजात विशेष गरजा असलेल्या मुलांसाठी समानता, स्वीकृती आणि आदराला प्रोत्साहन देण्यावर भर देण्यात आला. या कार्यक्रमाला पद्मश्री मुरलीकांत पेटकर, पालक प्रशिक्षक मनीष, सेजल राय, अभिजीत, वकील बालचंद्र निकेते आणि डॉ. बायना पांचाल यांच्यासह अनेक मान्यवर उपस्थित होते.

शाळेच्या संस्थापक आणि संचालिका शृंगी दुबे यांनी विद्यार्थी आणि शिक्षक व शिक्षकेतर कर्मचाऱ्यांचा त्यांच्या उत्कृष्ट योगदान, मेहनत आणि यशाबद्दल गौरव केला. हा सत्कार सोहळा विद्यार्थी व कर्मचाऱ्यांसाठी प्रेरणादायी ठरला. कार्यक्रमात विद्यार्थ्यांसह पालकांनीही उत्साहाने सहभाग घेतला. सर्वसमावेशकतेवर आधारित नाटक, स्किट्स आणि सांस्कृतिक सादरीकरणाच्या माध्यमातून मुलांच्या कलागुणांना व्यासपीठ मिळाले. सादरीकरणांनी केवळ प्रेक्षकांचे लक्ष वेधले नाही तर विशेष गरजा असलेल्या मुलांना समान संधी देण्याचा सामाजिक संदेशही दिला. शाळेच्या अध्यक्षा आशा दुबे आणि संचालिका तृप्ती मॅडम यांनी विद्यार्थी, पालक आणि शाळा परिवाराला प्रोत्साहन दिले.
‘प्रत्येक मुलासाठी संधी, सन्मान आणि समानता’ ही भावना या सोहळ्यातून अधोरेखित झाली. विशेष गरजा असलेल्या मुलांच्या क्षमता ओळखून त्यांना समाजाच्या मुख्य प्रवाहात समान संधी उपलब्ध करून देण्यासाठी हा कार्यक्रम महत्त्वाचा होता.