पिंपळे गुरव येथे ज्येष्ठ खेळाडूंचा सन्मान

अनुभवाचा वारसा नव्या पिढीसाठी प्रेरणादायी

उमेश सणस

पिंपरी : अंजोर फाउंडेशनचे संस्थापक अतुलदादा समर्थ आणि अंजोर फाउंडेशन ट्रस्टच्या वतीने ‘अंजोर स्पोर्ट्स’अंतर्गत राष्ट्रीय व आंतरराष्ट्रीय स्तरावर उल्लेखनीय कामगिरी करणाऱ्या ८९ ज्येष्ठ खेळाडूंचा विशेष सन्मान करण्यात आला. हा कार्यक्रम पिंपळे गुरव येथील निळू फुले नाट्यगृहात झाला. या वेळी विविध क्रीडा प्रकारांतील दिग्गज खेळाडूंना एकाच व्यासपीठावर आणत त्यांच्या कर्तृत्वाचा गौरव करण्यात आला.

हॉकी, फुटबॉल, बॉक्सिंग, योग, सायकलिंग यासह विविध क्रीडा प्रकारांमध्ये देशाचे प्रतिनिधित्व केलेल्या खेळाडूंचा यामध्ये समावेश होता. अर्जुन पुरस्कार तसेच शिवछत्रपती क्रीडा पुरस्काराने सन्मानित खेळाडूंचाही गौरव करण्यात आला. मैदानावर केलेल्या उल्लेखनीय कामगिरीमुळे क्रीडा क्षेत्राचा इतिहास समृद्ध करणाऱ्या या खेळाडूंच्या योगदानाची यावेळी दखल घेण्यात आली. ज्येष्ठ खेळाडूंनी आपल्या प्रदीर्घ कारकिर्दीतील संघर्ष, शिस्त, मेहनत आणि यशाचे अनुभव उपस्थितांसमोर मांडले. त्यांच्या अनुभवातून नव्या पिढीतील खेळाडूंना मार्गदर्शन मिळण्याबरोबरच क्रीडाक्षेत्रात सकारात्मक ऊर्जा निर्माण होण्यास मदत होईल, असा विश्वास व्यक्त करण्यात आला. विविध पिढ्यांतील खेळाडूंना एकत्र आणणारा हा उपक्रम क्रीडा क्षेत्रातील संवादासाठी महत्त्वपूर्ण ठरला.

यावेळी अतुलदादा समर्थ यांनी क्रीडा क्षेत्राच्या विकासासाठी CSRआणि क्राउडफंडिंगचे महत्त्व स्पष्ट केले. सरकारच्या विविध योजना आणि उपलब्ध साधनांचा प्रभावी वापर करून खेळाडूंना अधिक चांगल्या संधी उपलब्ध करून देण्याची गरज त्यांनी व्यक्त केली. समाज आणि उद्योगांच्या सहकार्याने क्रीडा क्षेत्रातील सुविधा व संधी अधिक व्यापक करता येतील, असेही त्यांनी सांगितले.

ज्येष्ठ खेळाडूंचा अनुभव पुढील पिढीसाठी मोठी संपत्ती आहे. या अनुभवाला योग्य व्यासपीठ देत नव्या खेळाडूंना संधी आणि सहकार्य मिळवून देणे, हा अंजोर स्पोर्ट्सचा उद्देश आहे, असे अतुलदादा समर्थ यांनी सांगितले.