पत्रकारांनी समाजहितासाठी अधिक जोमाने काम करावे : उपमहापौर शर्मिला बाबर

ओम साई फाउंडेशनतर्फे पत्रकार संघ व डिजिटल पत्रकार संघाच्या नवनिर्वाचित पदाधिकाऱ्यांचा सत्कार

पिंपरी : पत्रकारिता ही केवळ बातमी प्रसिद्ध करण्यापुरती मर्यादित नसून, समाजातील प्रश्नांना वाचा फोडून सर्वसामान्य नागरिकांना न्याय मिळवून देण्याची महत्त्वाची जबाबदारी पत्रकारांवर आहे. त्यामुळे नवनिर्वाचित पत्रकारांनी अधिक जोमाने समाजोपयोगी काम करावे. पत्रकारांना कोणत्याही प्रकारची मदत लागल्यास त्यांनी हक्काने संपर्क साधावा, असे आवाहन उपमहापौर शर्मिला बाबर यांनी केले.
पिंपरी-चिंचवड महापालिकेतील कै. भा. वि. कांबळे पत्रकार कक्षात ओम साई फाउंडेशनच्या वतीने पिंपरी-चिंचवड पत्रकार संघ तसेच पिंपरी-चिंचवड डिजिटल पत्रकार संघाच्या नवनिर्वाचित पदाधिकाऱ्यांचा सत्कार सोहळा आयोजित करण्यात आला होता. यावेळी बाबर बोलत होत्या.

पत्रकारांनी समाजाचा आवाज बनावे : संजय मराठे

ओम साई फाउंडेशनचे अध्यक्ष संजय मराठे म्हणाले, पत्रकार हा समाजाचा आरसा आणि सर्वसामान्यांचा आवाज असतो. समाजातील चांगल्या कामांना प्रसिद्धी देतानाच नागरिकांच्या समस्या निर्भीडपणे मांडण्याचे काम पत्रकारांनी केले पाहिजे. पत्रकारितेच्या माध्यमातून प्रशासनाचे लक्ष वेधून अनेक प्रश्न मार्गी लावता येतात. त्यामुळे नवनिर्वाचित पदाधिकाऱ्यांनी पदाची जबाबदारी ओळखून समाजहिताला प्राधान्य द्यावे.
आजच्या डिजिटल युगात बातमी काही क्षणांत मोठ्या प्रमाणात लोकांपर्यंत पोहोचते. त्यामुळे बातमी प्रसिद्ध करताना सत्यता, वस्तुनिष्ठता आणि विश्वासार्हता जपणे अत्यंत महत्त्वाचे आहे. पत्रकार संघटनांनी एकजुटीने काम करून पत्रकारांच्या प्रश्नांसोबतच समाजातील सामान्य नागरिकांच्या प्रश्नांसाठीही पुढाकार घ्यावा. पत्रकार आणि समाज यांच्यातील विश्वास अधिक दृढ करण्यासाठी ओम साई फाउंडेशन नेहमीच पत्रकारांच्या पाठीशी राहील, असेही मराठे यांनी सांगितले.

नवनिर्वाचित पदाधिकाऱ्यांचा गौरव

यावेळी पिंपरी-चिंचवड पत्रकार संघाचे नवनिर्वाचित अध्यक्ष प्रवीण शिर्के, कार्याध्यक्ष प्रवीण (बाबू) कांबळे, महिला अध्यक्षा माधुरी कोराड, महिला उपाध्यक्षा श्रद्धा प्रभुणे, उपाध्यक्ष बद्रीनारायण घुगे, खजिनदार दिनेश दुधाळे, कार्यकारिणी सदस्य सारिका भिंगे, पंकज लालझरे, पत्रकार हल्ला विरोधी कृती समितीचे अनिल भालेराव तसेच सल्लागार बाळासाहेब ढसाळ यांचा सत्कार करण्यात आला.
पिंपरी-चिंचवड डिजिटल पत्रकार संघाचे अध्यक्ष राम बनसोडे, कार्याध्यक्ष देवा भालके, उपाध्यक्ष गौरव साळुंखे व मुझफ्फर इनामदार, सरचिटणीस भीमराव बरगडे, सहसरचिटणीस नीलेश सायकर, खजिनदार श्याम सोनवणे, सहखजिनदार शहनाज कुरणे, कार्यकारिणी सदस्य शैलेश जाधव व सचिन सोनवणे यांचाही शाल व छत्रपती शिवाजी महाराजांची प्रतिमा देऊन सन्मान करण्यात आला. तसेच माजी नगरसदस्य मारुती भापकर, ज्येष्ठ पत्रकार नाना कांबळे आणि बापूसाहेब गोरे यांचाही शाल व छत्रपती शिवाजी महाराजांची प्रतिमा देऊन विशेष सन्मान करण्यात आला.
यावेळी ओम साई फाउंडेशनचे अध्यक्ष संजय मराठे, उमेश सणस, पराग डिंगणकर, तोफिक सय्यद, शांताराम मोरे आदी उपस्थित होते. कार्यक्रमाचे सूत्रसंचालन महिला अध्यक्षा माधुरी कोराड यांनी केले, तर अध्यक्ष प्रवीण शिर्के यांनी आभार मानले.