पिंपरी चिंचवड मधील कलावंतांची गणेशोत्सवानिमित्त बालगीतांची विशेष निर्मिती

उमेश सणस

पिंपरी : पिंपरी चिंचवडमधील सांस्कृतिक चळवळ वाढीस लागण्याच्या दृष्टिकोनातून पिंपळे सौदागर येथील सुप्रसिद्ध कलावंत भारती न्यायाधीश, पिनाक न्यायाधीश आणि अक्षय कुलकर्णी या तिघांनी श्री गणेश उत्सवानिमित्त गीत – संगीताच्या माध्यमातून आपली सेवा श्री गणेशाच्या चरणी अर्पण केली. गणेशोत्सवाच्या पार्श्वभूमीवर या कलावंतांनी “मोरया मोरया गणपती बाप्पा मोरया” या शिर्षकाखाली “आनंद आम्हाला झाला भारी, गणपती बाप्पा आले घरी” आणि गणेश विसर्जन निमित्ताने “बाप्पाचा निरोप” या शिर्षकाखाली “बाप्पा रे बाप्पा, गणपती बाप्पा” या दोन बाल गीतांची निर्मिती केली असून “ही दोन्ही गाणी” छोटू मराठी” ( Chotu.Marathi)या यू ट्यूब चॅनलवर प्रसारीत केली आहेत.
“मोरया मोरया गणपती बाप्पा मोरया” हे गीत भारती न्यायाधीश यांनी लिहिले असून, पिनाक न्यायाधीश याने ते गायले आणि संगीतबद्ध केले आहे. विसर्जन निमित्त “बाप्पाचा निरोप” हे गाणे भारती न्यायाधीश यांनी लिहिले असून, गायले आहे तर पिनाक न्यायाधीश याने ते संगीतबद्ध केले आहे. गाण्याची व्हिडिओ निर्मिती अक्षय कुलकर्णी याने केली असून, दृकश्राव्य स्वरुपातील या दोन्ही गीतांना चांगला प्रतिसाद मिळत आहे. या दोन्ही गीतांची संकल्पना विजय न्यायाधीश यांची आहे. गणेशोत्सवानिमित्त भारतीय सण, उत्सव याबाबत लहान मुलांमध्ये जाणीव-जागृती निर्माण व्हावी तसेच मराठी भाषेचे संवर्धन, प्रसार आणि प्रचार करण्याच्या हेतुने या गाण्यांची निर्मिती करण्यात आली आहे.