मेडिकलमध्ये फार्मासिस्ट नसेल तर होणार जागेवरच कारवाई

पिंपरी : महाराष्ट्र अन्न व औषध प्रशासनाने ११ ऑगस्ट २०२६ रोजी महत्त्वाचा आदेश जारी केला आहे. त्यात यापुढे औषध विक्रेत्यांविरुद्ध परवाना निलंबन किंवा रद्द करण्याची प्रशासकीय कारवाई झाल्यास, त्या आदेशाची तात्काळ अंमलबजावणी करण्याचे निर्देश देण्यात आले आहेत.

यापूर्वीच्या २०१८ च्या परिपत्रकानुसार अपील करण्यासाठी ९० दिवसांचा कालावधी देण्याची तरतूद होती; मात्र त्या आदेशाची अंमलबजावणी नेमकी कधी करायची याबाबत स्पष्ट निर्देश नव्हते. आता ते जुने परिपत्रक अधिक्रमित करून प्रशासकीय कारवाईचे आदेश तात्काळ प्रभावाने लागू करण्याचे निर्देश देण्यात आले आहेत. त्यामुळे मेडिकल मालकांनी विना फार्मासिस्ट मेडिकल सुरू ठेवू नये.
सर्व केमिस्ट बांधवांनी औषध कायदा, नियम व FDAच्या सर्व नियमांचे काटेकोरपणे पालन करावे. कोणतीही त्रुटी होऊ नये याची विशेष काळजी घ्यावी. ही माहिती आपल्या सर्व केमिस्ट बांधवांपर्यंत पोहोचवणे अत्यंत गरजेचे आहे. अन्यथा कारवाई अटळ आहे.