मोशी–देहू–आळंदी मेट्रोसाठी विकास साने यांचा पुढाकार

सुनेत्रा पवार यांची सकारात्मक दखल, श्रावण हर्डीकरांना तातडीने निर्देश

पिंपरी : मोशी–देहू–आळंदी थेट मेट्रो मार्गाचा आराखडा तयार करून या मार्गाच्या विकासाला गती देण्याची मागणी पिंपरी-चिंचवड महापालिकेचे नगरसेवक विकास नामदेव साने यांनी केली आहे. यासंदर्भात आज पुणे येथील विभागीय आयुक्त कार्यालयात महाराष्ट्र राज्याच्या उपमुख्यमंत्री सुनेत्रा पवार यांची भेट घेऊन त्यांना निवेदन देण्यात आले.
​मोशी, देहू आणि आळंदी परिसरात गेल्या काही वर्षांत झपाट्याने नागरीकरण झाले असून, वाढती लोकसंख्या आणि वाहनांची संख्या यामुळे या भागातील वाहतुकीवर मोठा ताण निर्माण झाला आहे. वाढणाऱ्या अपघात आणि त्यात मृत्युमुखी पडणाऱ्या निष्पाप नागरिकांची संख्या देखील अधिक आहे. त्याचबरोबर देहू आणि आळंदी ही महाराष्ट्राच्या संतपरंपरेशी आणि वारकरी संप्रदायाशी निगडित प्रमुख तीर्थक्षेत्रे असल्याने वर्षभर या परिसरात मोठ्या संख्येने भाविक व नागरिकांची ये-जा असते. पालखी सोहळे, यात्रा आणि धार्मिक कार्यक्रमांच्या काळात या मार्गावरील वाहतुकीचा प्रश्न अधिक गंभीर बनतो. ​या पार्श्वभूमीवर मोशी–देहू आणि पुढे देहू–आळंदी असा थेट मेट्रो मार्ग विकसित झाल्यास नागरिक, भाविक आणि वारकऱ्यांना सुरक्षित, जलद व सुलभ सार्वजनिक वाहतूक सुविधा उपलब्ध होऊ शकते. तसेच भविष्यातील वाढत्या वाहतुकीचा विचार करता हा मार्ग पिंपरी-चिंचवड शहर आणि पुणे जिल्ह्याच्या सार्वजनिक वाहतूक व्यवस्थेच्या दृष्टीने महत्त्वपूर्ण ठरू शकतो, अशी भूमिका विकास साने यांनी निवेदनाद्वारे मांडली.

​उपमुख्यमंत्री पवार यांच्याकडून सकारात्मक दखल

या मागणीची उपमुख्यमंत्री सुनेत्रा पवार यांनी सकारात्मक दखल घेतली. या विषयाचे महत्त्व लक्षात घेऊन त्यांनी तत्काळ पुणे महामेट्रोचे श्रावण हर्डीकर यांना मोशी–देहू–आळंदी मेट्रो मार्गाच्या मागणीसंदर्भात आवश्यक तांत्रिक पाहणी, सर्वेक्षण व पुढील कार्यवाही करण्याचे निर्देश दिले. ​यामध्ये भविष्यातील प्रवासी संख्या, मार्गाची तांत्रिक व्यवहार्यता, संभाव्य स्थानके, विद्यमान व प्रस्तावित मेट्रो मार्गांशी जोडणी तसेच देहू–आळंदी या तीर्थक्षेत्रांच्या वाहतूक गरजा यांचा अभ्यास करून सविस्तर आराखडा तयार करण्याची मागणी विकास साने यांनी केली आहे.

आज लोकप्रतिनिधी आणि नागरिकांचे शिष्टमंडळ भेटणार महामेट्रोचे व्यवस्थापकीय संचालकाना

याच अनुषंगाने आज ७ सप्टेंबर २०२६ रोजी देहू-आळंदी सह, डुडुळगाव, मोशी, जाधववाडी, चिखली व तळवडे परिसरातील लोकप्रतिनिधी आणि नागरिकांचे शिष्टमंडळ माझ्यासोबत महामेट्रोचे व्यवस्थापकीय संचालक श्रावण हर्डीकर यांची भेट घेणार आहे. या भेटीत मोशी–देहू–आळंदी मेट्रो मार्गासाठी तांत्रिक पाहणी, सर्वेक्षण, व्यवहार्यता तपासणी तसेच सविस्तर आराखडा तयार करण्याबाबत पुढील कार्यवाहीची मागणी करण्यात येणार आहे.

नागरिकांच्या या महत्त्वपूर्ण मागणीला शासनस्तरावर मिळालेला सकारात्मक प्रतिसाद आणि आता महामेट्रोसोबत होणारी प्रत्यक्ष चर्चा यामुळे मोशी–देहू–आळंदी मेट्रो मार्गाच्या मागणीला निश्चितच गती मिळेल. ​नागरिकांच्या दैनंदिन वाहतुकीच्या प्रश्नांसोबतच भविष्यातील शहर विकासाचा विचार करून पायाभूत सुविधांसाठी शासनदरबारी सातत्याने पाठपुरावा करण्याचा निर्धार त्यांनी व्यक्त केला.
– विकास नामदेव साने, नगरसेवक.