वायसीएम रुग्णालयातील कॅन्टीनवर एफडीएचा छापा

चार खाद्यपदार्थांचे नमुने ताब्यात

उमेश सणस

पिंपरी : पिंपरी-चिंचवड महापालिकेच्या यशवंतराव चव्हाण स्मृती (वायसीएम) रुग्णालयातील कॅन्टीनमध्ये अन्नाच्या दर्जाबाबत आलेल्या तक्रारींची दखल घेत अन्न व औषध प्रशासनाने (FDA)अचानक तपासणी केली. तपासणीदरम्यान अन्न सुरक्षा नियमांचे पालन आणि स्वच्छतेबाबत त्रुटी आढळल्याची माहिती समोर आली आहे.
FDAच्या पथकाने कॅन्टीनमधील चार खाद्यपदार्थांचे नमुने ताब्यात घेतले असून, ते प्रयोगशाळेतील तपासणीसाठी पाठविण्यात आले आहेत.

या नमुन्यांच्या अहवालानंतर अन्नपदार्थांमध्ये भेसळ किंवा इतर नियमांचे उल्लंघन झाले आहे का, याबाबतचे चित्र स्पष्ट होणार आहे. त्यामुळे प्रयोगशाळेच्या अहवालाकडे लक्ष लागले आहे. तपासणीत आढळलेल्या त्रुटींच्या पार्श्वभूमीवर कॅन्टीन चालकाला १४ दिवसांची कारणे दाखवा नोटीस बजावण्यात आली आहे. संबंधितांकडून स्पष्टीकरण मागविण्यात आले असून, प्रयोगशाळेच्या निष्कर्षानुसार पुढील कायदेशीर कारवाई केली जाणार असल्याचे वृत्त आहे. दरम्यान, कॅन्टीनमध्ये रुग्ण आणि त्यांच्या नातेवाइकांना पिण्याचे पाणी उपलब्ध करून देण्याबाबतही तक्रारी समोर आल्या आहेत. त्यामुळे अन्नाची गुणवत्ता, स्वच्छता आणि रुग्णालयातील कॅन्टीनच्या मूलभूत सुविधांबाबत पुन्हा प्रश्न उपस्थित झाले आहेत. महत्त्वाचे म्हणजे, खाद्यपदार्थांमध्ये भेसळ झाल्याचा अंतिम निष्कर्ष अद्याप समोर आलेला नाही. प्रयोगशाळेचा अहवाल प्राप्त झाल्यानंतरच त्याबाबत अधिकृत निष्कर्ष निघणार आहे. यशवंतराव चव्हाण स्मृती रुग्णालय हे पिंपरी-चिंचवड महापालिकेचे प्रमुख ७५० खाटांचे रुग्णालय असून, येथे दररोज मोठ्या संख्येने रुग्ण आणि त्यांचे नातेवाईक येतात. यामुळे कॅन्टीनचालकाने गुणवत्तापूर्ण खाद्यपदार्थांची विक्री करावी.